ትውልድ ተሻጋሪ አጀንዳዎችን ብቻ ልናስብ እና ልንተግብር ይገባል

0
264

ይህች ዓለማችን በርካታ አማራጭ ሀሳቦች በተለያዩ መንገዶች እዚህም እዚያም የሚደመጡባት ናት፡፡ ከእነዚህ አማራጭ አስተሳሰቦች መሀል አንዳንዶቹ በቁጣ ድምጽና በመሳሪያ ታጅበው ሳንፈልጋቸውና ሳናምንባቸው እንድንቀበላቸው የሚያስገድዱ ናቸው፡፡ እነዚህ አስተሳሰቦች የዜጎችን መብቶች ለመጣስና ነጻነትንና ዴሞክራሲን ለማጥፋት እንደተነሱ ገና ከአነሳሳቸው የሚያስታወቁ ናቸው፡፡

ሌሎቹ አማራጨ አስተሳሰቦች ደግሞ በማባበያ እና በሽንገላ ቃላትየታጀቡ፤ በበሬ ወለደ የፈጠራ ወሬ የተሞሉ ሲሆን የዋሆችን የማሳመን አቅማቸው ግን ከፍተኛ ነው፡፡ ብዙዎችን ስሜታዊ በማድረግ የነገውን አርቀው እንዳያስተውሉና ትውልድ ተሻጋሪ አስተሳሰብ ውስጥ እንዳይገቡ እንቅፋት ይሆናሉ፡፡ ጦር ከፈታው ወሬ የፈታው ነውና ብሂሉ ዜጎች በስሜታዊነት ተነሳስተው ጠብና ሁከት እንዲፈጠር፤ በዚህም  ሀገር እንዳይረጋጋና ወደ ሠላም፣ ልማትና ዴሞክራሲ  እንዳይገባ ተግዳሮት ሆነው ቆይተዋል፡፡

ሌላውና ከላይ ከጠቀስናቸው አማራጭ አስተሳሰቦች ለየት የሚለው ነባራዊ ሁኔታዎችን ያገናዘበና አሁን ካለው ተጨባጭ እውነታ በመነሳት በብዙዎች ሊታመንብት የሚገባ ራዕይን የሚያመላክት ነው፡፡ እንዲህ ያለውን አማራጭ አስተሳሰብ በርካቶች ሳይገደዱና ሳይታለሉ በጋራ ለመልማትና ነገን የተሸለ ለማድረግ ካላቸው ተመሳሳይ የጋራ ፍላጎት በመነሳት በዙሪያው የሚሰለፉለት አስተሳሰብ ነው፡፡

እንግዲህ የመምረጥ፣ የመከተል፣ የመደገፍ እና የመተግበሩ ትልቁ ስልጣን የተሰጠው ለእያንዳንዱ ዜጋ ሲሆን ስንደመር ህዝብ እንሆናለን፡፡ እነዚህ አስተሳሰቦች በየዘመኑ የነበሩና ለወደፊትም በህዝብ መሀል ተደብቀው የሚኖሩ ሲሆን ዕድሉን ሲያገኙና ወደ ሥርዓትነት ሲቀየሩ ለሀገር ልማትም ሆነ ውድመት መሠረት ሊሆኑ የሚችሉ ናቸው፡፡

ለሀገር ልማት ጠንካራ መሠረት ሊሆኑ የሚችሉ አስተሳሰቦች ወደ ሥርዓትነት እንዲቀየሩ እና ለሀገር ውድመት መነሻ የሚሆኑትን አስተሳሰቦች ደግሞ ወደ ሥርዓትንት እንዳይቀየሩ ትልቁንና የአንበሳውን ድርሻ መወጣት ያለበት ህዝብ ነው፡፡ ምክኒያቱም እነዚህ ሁሉም አስተሳሰቦች ከህዝብ ውጪ ከባህር እንደ ወጣ ዓሣ ህልውና ስለማይኖራቸው ነው፡፡

ሠነፎች ትውልድ ተሻጋሪ ሥራ ከመሥራት ይልቅ ቁጭ ብለው ሀገር የሚያፈርስ እና ትውልድን የማይገነባ  አሉባልታቸውን ይፈበርካሉ፡፡ ደካሞች ደግሞ ችግሮችን እየፈለፈሉ የሚሠራውን ከማብጠልጠል ያለፈ አንዳች የሚረባ መፍትሄ በአማራጭነት ሳያቀርቡ አና የመፍትሄ አካል ከመሆን ይልቅ የችግር አካል በመሆን የትውልድን ልብ ያዝላሉ፡፡

አስተዋዮች እና ብርቱዎች ግን ለማንኛውም ችግር አማራጭ የሚሆን የመፍትሄ ሀሳብ ከማቅረብ በዘለለ የመፍትሄው አካል በመሆን ትውልድን የሚሻገር ሥራ ይሠራሉ፡፡ እንግዲህ መደመራችን ካልቀረ ወደዚህኛው አስተሳብና ተግባር እንደመር፡፡

የመንግስት ኮሚዩኒኬሽን ጉዳዮች ቢሮ

                                                     ድሬዳዋ

                                                       10/05/2011ዓ.ም

LEAVE A REPLY

Please enter your comment!
Please enter your name here