ለውጡ ያመጣውን ውጤት ወጣቱ ሊረዳ ይገባል

0
113

ከቅርብ ጊዜ ወዲህ ሀገራችን አጓጊ፣ተስፋ ሰጪ እና አስደማሚ ኢኮኖሚያዊ፣ፖለቲካዊ እና ማህበራዊ ውጤቶች የተመዘገቡበት የለውጥ ጉዞ ላይ ትገኛለች፡፡ መንግሥትና ገዥው ፓርቲ የሕዝቡን ጥያቄ በዘለቄታዊ መንገድ ለመመለስ በቅርቡ ባደረጉት ጥልቅ ተሃድሶ ተከታታይ የሆነ ሥር ነቀል ፖለቲካዊ የማሻሻያ እርምጃዎችን ሲወስድ ቆይቷል፡፡ 

መንግሥት በርካታ የተቃዋሚ የፖለቲካ ፓርቲ አመራሮችን፣ ጋዜጠኞችንና የፖለቲካ አክቲቪስቶችን ከእስር ፈትቷል፡፡ በአገር ውስጥ ካሉ የፖለቲካ ፓርቲዎችና ሲቪክ ማኅበራት ጋርም በለውጡ ዙሪያ ሠፊ ውይይትን አድርጓል፡፡ በውጭ አገራት ተሰደው የነበሩ ፖለቲከኞችና አክቲቪስቶች ወደ ሀገር ውስጥ እንዲገቡ ተደርጓል፡፡

 ሌላው ትልቅ ዋጋ የሚሰጠውና ለአገሪቱም ሆነ ለአካባቢው ሠላምና ጸጥታ መስፈን ከፍተኛ አሰተዋጽኦ የሚያደርገው ከኤርትራ ጋር በአልጀርስ የተደረገውን ስምምነት ለመቀበል መንግሥት የወሰደው እርምጃ ነው፡፡ ከዚህም በተጨማሪም፣ የተለያዩ የፖለቲካ ምህዳሩን የማጥበብ ሚና የተጫወቱ ሕጎችን  የማሻሻል ሥራም የተጀመረ ሲሆን፣ የፍትህና የፀጥታ ተቋማትን ጨምሮ ሠፋ ያለ ተቋማዊ የመዋቅር ማሻሻያዎችም ተደርገዋል፡፡ እነዚህ አና ሌሎችም በጎ እርምጃዎች በመወሰዳቸው አንዣቦ የነበረው የስጋት ድባብ ከመቀየሩም ባሻገር በሕዝቡ እና  በመንግሥት መሀል  ያለውን የመተማመን ደረጃ ከፍ አድርጎታል፡፡

እነዚህ በተከታታይ የተወሰዱ በጎ እና ተስፋ ሰጪ እርምጃዎች  አዲስ የለውጥና የሽግግር መንፈስ በአገሪቱ እንዲሰፍን አድርገዋል፡፡ በዚህ ሁሉ ሂደት የሚገርመው እና የሚያሳዝነው ለውጡን የሚያደናቅፉ፤ በሕዝቦች መካከል መቃቃርን፣ ጥላቻን፣ አለመተማመንንና መነጣጠልን ያስከተሉ በርካታ ሥርዓት አልበኛ እንቅስቃሴዎች፣ ግጭቶችና ብጥብጦች መከሰታቸው ነው፡፡

ይህ ለውጥ እንዲመጣ ወጣቱ ብዙ ዋጋ ከፍሏል፡፡ ወጣቱ ለውጥ ፈላጊ መሆኑን ከመናገር ባለፈ በተግባር እያረጋገጠ ነው፡፡ ታዲያ ይህንን ለውጥ ሊያደናቅፉ የሚችሉና በተለይ በአሁን ወቅት የላቀ ትኩረት የተሰጠውን የአገራዊ አንድነት ግንባታ ሂደት በተፈለገው ፍጥነት እንዳይሄድ እያደረጉ የሚገኙ ክስተቶች ከየት መጡ? ከጀርባ ሆኖ እነዚህን ክስተቶች የሚያቀነባብረውስ ማነ ነው? ብሎ ወጣቱ ሊጠይቅ ይገባል፡፡

በተለይም ከለውጡ በኋላ የተከሰቱትን ግጭቶችና ግጭቶቹ በሕዝቡ መካከል ያስከተሏቸውን ጥርጣሬ፣ ጥላቻና መነጣጠል በፍቅር እና በይቅርታ በመደመር እንዲቋጩ ለማድረግ ብሎም የሚስተዋለውን ሥርዓት አልበኝት በህጋዊ መንገድ የሕግ የበላይነትን በማስጠበቅ ለመፍታት በሚደረገው ርብርብ ወጣቱ ግንባር ቀደም ሚናውን ሊወጣ ይገባል፡፡

የመንግስት ኮዩኒኬሽን ጉዳዮች ቢሮ

                                                      ድሬደዋ

                                                                         01/04/2011ዓም

 

LEAVE A REPLY

Please enter your comment!
Please enter your name here