ብዙ ዋጋ ከፍለን የደከምንበትን ጉዳይ ማን ይረከብ?

0
162

የአስተዳደሩ መልዕከት

ብዙ ዋጋ ከፍለን የደከምንበትን ጉዳይ ማን ይረከብ?

ሀገር የሚገነባው በትውልድ ቅብብሎሽ እንጂ በአንድ ትውልድ ብቻ ተገንብቶ ያለቀለት ሀገር በዚህ ምድር ላይ የትም አይገኝም፡፡ ስለሆነም ካለፈው ትውልድ ያለው ትውልድ ያላለቀ ሥራን እየተረከበና ከውድቀታቸውና ከስኬታቸው እየተማረ ሁሉም በተራው አደራውን ሲወጣ ነው ሀገር እዚህ የደረሰችው፡፡ ይህ የአደራ ቅብብሎሽ ትላንትናም ነበር ዛሬም አለ ነገም ይቀጥላል፡፡

በዚህ ሁሉ ሂደት ሊወቀስም ሊመሰገንም የሚችል ትውልድ ይኖራል፡፡ አንዳንድ ትውልድ የራሱን አደራ ተወጥቶ የመጪውንም ትውልድ ሥራ ያመቻቻል፡፡ በዚህም ትውልድ እያመሰገነው ቢሞትም ከመቃብር በላይ ይኖራል፡፡ አንዳንድ ትውልድ ደግሞ ባገኘው ዕድልና ዕድሜ የራሱን ጥቅም ብቻ ሲያሳድድ ለቀጣዩ ትውልድ ተጨማሪ የቤት ሥራ ትቶ ያልፋል፡፡ በዚህም ሳቢያ የታሪክ እና የትውልድ ተወቃሽ በመሆን ሁለተኛውን ሞት ይሞታል፡፡

አሁን ያለው ተውልድ ቆም ብሎ ለመጪው ትውልድ ስለሚያወርሰው ነገር ደጋግሞ ማሰብ አለበት፡፡ ድህንት፣ ኋላቀርነት፣ጥላቻ፣ ቂም በቀል፣ ኪራይ ሰብሳቢነት፣ ትምክህት፣ ጥበት፣ዘረኝነት የሀይማኖት አክራሪነት በጭራሽ ወደ ቀጣዩ ትውልድ እንዳይሻገሩ አቅምን አሟጦ ሊሠራ ይገባል፡፡ በጥላቻ እና በቂም በቀል ላይ ከከፈትነው መጠነ ሰፊ ዘመቻ ባልተናነሰ ደረጃ በእንዚህ ላይም የተጠናከረና ቀጣይነት ያለው ዘመቻ መክፈትና መረባረብ የምን ጊዜም ትኩረታችን ሊሆን ይገባል፡፡

በአመለካከትና በተግባር እዚህም እዚያም ብቅ እያሉ የጠፉ እየመሰሉ ተመልሰው እንደገና የሚያገረሹትን እነዚህን ሀገርንና ህዝብን የሚያጠፉ አመለካከትና ተግባራት መዋቅሮችን የመበጣጠስ ሥራ ቀጣይነቱ ትኩረት ሊሠጠው ይገባል፡፡ የፍቅር፣የይቅርታና የመደመር የለውጥ ጉዟችንን በማጠናከር ለመጪው ትውልድ በጎ በጎውን እንጂ መጥፎ መጥፎውን ወደሚቀጥለው ትውልድ እንዳይሸጋገሩ ዙሪያ መለስ ርብርብ ልናደርግ ይገባል፡፡

እነዚህን በስውርና በግልጽ እየታዩ ያሉ አመለካከቶችና ተግባራት ከመሠረታቸው ለመናድ ታስቦ በተሠራው ሥራ የታዩ ለውጦች ቢኖሩም በቂ ግን አይደለም፡፡ ተቋማዊ አደረጃጀትና አቅም መፍጠር ተችሏል፡፡ ለእነዚህ አመለካከቶችና ተግባራት የማይመች ተቋማዊ አሠራርና አደረጃጀት ከመፍጠር ጐን ለጐን አመለካከቶቹንም ሆነ ተግባራቱን ፈፅሞ የማይሸከም ትውልድ በመፍጠር የጀመርነውን የለውጥ ጉዞ ለማስቀጠል ውጤታማ ሥራ ለመሥራት በእጅጉ አስፈላጊ ነው፡፡

እነዚህ ከላይ የጠቀስናቸው ተግባራትና አመለካከቶች በተያያዝነው የፍቅር፣ የአንድነትና የመደመር ጉዞ ግስጋሴ ፊት የተደቀኑ ፈተናዎች መሆናቸውን በተደጋጋሚ ካሳለፍናቸው ተሞክሮዎች በተግባር ለመመልከት ችለናል፡፡ እነዚህን ፈተናዎች በብቃት ለመወጣት አምርሮ የህግ የበላይነትን ማስከበሩ እንዳለ ሆኖ ትውልድን ማንቃት ማስተማርና እነዚህን አመለካከቶች የማይሸከምና በሀገር አንድነት ላይ ጽኑ አቋም ያለው ትውልድ መገንባት ይገባል፡፡

ምክኒያቱም ያለማናትን፣ ሠላሟ እንዲረጋገጥ ብዙ ዋጋ የተከፈለላትንና ህዳሴዋን ለማረጋገጥ ደፋ ቀና የምንልላትን መተኪያ የሌላትን ሀገር የምናስረክበው ለሀገሩም ለወገኑም ታማኝ ለሆነ ትውልድ ሊሆን ይገባል፡፡

 የመንግስት ኮሚዩኒኬሽን ጉዳዮች ቢሮ

 ድሬደዋ

28/01/2011 ዓም

LEAVE A REPLY

Please enter your comment!
Please enter your name here